رحلة سفر
وجودك معايا .. هَوّن عليا .. رحلة السفر
والله ماحسيت .. ببُعدَك عني
ولا كأني في مطار وسفر
ساعة ما بصيت فـ عنيك
قلبي جوايا طبَّعك
ساعة ماسلّمت عليك ..
دقة قلبك .. بسمَعك
وكأن ساعة لقاك .. يا حبيبي
بلاقيك .. مش بودعك
***************
دقة ساعة السفر .. وتجمعوا كل المسافرين
وأنا لا حس ولا خبر ..غير همس صوتك ..
في ودني رنين
زعق واحد فيا وقال : أنت يا للي سرحان ..
يا للا سيب المكان
أنت ايه .. مش من المسافرين !
وانا معاك .. تايه فيك
دُخان أبيض .. وطَرحة بيض
وانا وانت .. وسط السحاب .. وفـ حضن ايدينا ..
طايرين .. فـ الهوا طايرين
وانت معايا ياحبيبي بتغني وأسمعك
وكأن ساعة لقاك .. يا حبيبي .. بلاقيك .. مش بودعك
***************
دار المحرك .. ياريته ما دار
لانا عاوز أسافر .. ولا أسيب المطار
وبقيت فوق سماكي يا مصر
آه يا مصر .. يا اغلى بلد
فيكِ أول حب .. في حياتي اتولد ..
آه يا مصر .. يا وطني .. يا امي
حبك .. يا مصر .. بيجري .. بيجري .. في دمي
لكن يا مصر .. بَحبك أكتر اليوم
لما حبيت .. حبيبي .. كده من كام يوم
وانت معايا .. يا حبيبي .. بتكلمني .. وأسمعك
وكأن ساعة لقاك .. يا حبيبي ..بلاقيك .. مش بودعك
***************
شفت نهرك فـ عنيه .. الله عليه
يسقي .. ويروي العطشان
وانا العطشان .. يا رب ما يكون فـ يوم
تاني .. ابدًا حرمان !
شفت خيرِك .. بين شفايفه
لما يتبَسّم .. قلبي يفتَّح
كأنه زهرة في بستان
شفت بدرك .. منور ليله
لما شفت حسنه وبهاه
الله .. الله .. وانت معايا يا حبيبي ..
ساكت .. اسمعك
وكأن .. ساعة لقاك .. يا حبيبي
بلاقيك .. مش بودعك
***************
فـ المطار .. طلبتَك فـ التليفون
الو .. الو .. وَحِشني .. وحِشني
ها اقابلك امتي .. هاجي لك بكره !
خمسة .. والا سته .. واحد هز كتفي .. وقال :
الشنط فـ السيارة
- يا خسارة .. يا خسارة
وانت معايا .. يا حبيبي ..
في طريقي وفـ سكتي
لا انا حاسس .. بشوارع ..
ولا حاسس بغربتي
وطَلّعت صورتك .. من شنطتي
لا .. سبت صورتك .. من إيديا
في قلبي .. صورة أكبر
اللهُ أكْبَر .. اللَّه أكْبَر
الله يخليك .. ويجمعني بيك
ولاعمر يجي يوم تاني .. أودعك
وانت معايا .. يا حبيبي
شايفك .. وباسمعك
وكأن ساعة لقاك .. يا حبيبي بلاقيك ..
مش بودعك
***************
رحلة سفر .. كلمات .. سعد المهدي (رحلة سفر )
إرسال تعليق