*** باشـــــــا ***
ــــــــــــــــــــــــــ
باشا يا باشا // يا أصل البشاشا
ياواكل الدنيا // فى حتة بغاشا
تقرقش فيها // وتملا كرشك
وتلف الباقي // ف حتة قماشه
باشا ياباشا // يا أصل البشاشا
********
حن شويه // وبطل أسيه
وارحم وحس // وبطل رياسه
وشوف البشر // راح البصر
ومن ضعفهم // جاتهم هشاشه
باشا ياباشا // يا أصل البشاشا
********
باشا يا قاعد // فوق برج عالي
ولا بتساعد // غير نفسك ياغالي
ودايماً تقول : // انـــــــــك حبيبنا
والموت واخدنا // واخدة حشاشه
باشا ياباشا // يا أصل البشاشا
********
باشا يا فارد // تملي عودك
تعالي وقوللي : // فينها وعودك
والا كلامك // مدهون بزبده
ناعم وسايح // زي الفراشة
باشا ياباشا // يا أصل البشاشا
********
باشا يانايم // وهايم أحلام
حقيقي بتقدر // ازاي تنام ؟
وحق الغلابه // ف بطن الديابة
عايشين ف ضلك // بحكم الإعاشة
باشا ياباشا // يا أصل البشاشا
********
حاسب يا باشا // وعلى مهلك
لودامت لغيرك // ماكانتش جاتلك
واللى ح تاكله // دا بكره ياكلك
ونصيبك قاعد لك // بس ع الحاشه
باشا ياباشا // يا أصل البشاشا
********
الشاعر رفعت أبو العلا
إرسال تعليق